მეტამონაცემები Inspire-ს განმარტებით წარმოადგენს მონაცემებს მონაცემების შესახებ (data about data) ანუ სივრცითი მონაცემების და ელექტრონული სერვისების აღმწერ ინფორმაციას. შეიცავს ინფორმაციას სივრცითი მონაცემების და ელექტრონული სერვისების შინაარსის, კატეგორიის, კუთვნილების, ფორმატის, მონაცემთა შექმნისა და დამუშავების მეთოდების, სივრცითი არეალის, ხარისხის, მათი გამოყენების პირობების, შეზღუდვების და სხვა განსაკუთრებული მახასიათებლების შესახებ, რაც აუცილებელია მომხმარებლისთვის და წარმოადგენს ეროვნული სივრცითი მონაცემების ინფრასტრუქტურის შემადგენელ აუცილებელ კომპონენტს.
მეტამონაცემების საშუალებით ცალსახად შესაძლებელია: ძიების პროცედურის განხორციელება თავად მონაცემებთან შეხების გარეშე, დოკუმენტირებული სივრცითი მონაცემების ან ელექტრონული სერვისების იდენტიფიცირება აუცილებელი და საკმარისი დეტალიზაციის ხარისხით, ინფორმაციის გაცვლისას სხვადასხვა სტრუქტურის მქონე მონაცემების ურთიერთთავსებადობის შეფასება, რაც ხსნის ახალ შესაძლებლობებს მონაცემების და პროგრამული უზრუნველყოფების ერთობლივი დამუშავებისა და ინტეგრაციისათვის. მონაცემებზე შეზღუდვების ან საფასურის არსებობის შემთხვევაში მეტამონაცემებში არის ჩანაწერი ამის შესახებ. მეტამონაცემები ასევე გამოიყენება კატალოგიზაციის, რეგისტრაციის, სტატისტიკური დამუშავებისა და ანალიზის პროცესების განხორციელებისას.
მეტამონაცემების ფორმირების წესები რეგლამენტირებულია საერთაშორისო სტანდარტებით ISO, OGC, Inspire და სხვა.
-
მეტამონაცემების კატალოგი
ერთ-ერთი მნიშვნელოვანი აპლიკაცია, სადაც კატალოგიზაციის პრინციპების და პარამეტრების გათვალისწინებით სისტემატიზებულად არის განთავსებული გეოგრაფიული მონაცემებისა და ელექტრონული სერვისების აღმწერი მეტამონაცემები. სპეციალურად შემუშავებული საკვანძო/საძიებო სიტყვების გამოყენება უზრუნველყოფს მეტამონაცემების კატალოგში სწრაფი, ეფექტური, სტრუქტურირებული ძიების, შედარების და ვიზუალიზაციის ფუნქციების განხორციელებას თავად მონაცემებთან შეხების გარეშე, რაც ამარტივებს სივრცითი მონაცემების ნაკრებების გამოყენებას და ელექტრონული სერვისებით სარგებლობას.
-
მეტამონაცემების რედაქტორი
აპლიკაცია უზრუნველყოფს სივრცითი მონაცემების და მათთან ასოცირებული ელექტრონული სერვისების აღმწერი მეტამონაცემების წარმოებას საერთაშორისო სტანდარტებზე (ISO 19115, ISO 19119) დაფუძნებით.
-
მეტამონაცემების ვალიდატორი
აპლიკაცია უზრუნველყოფს გეოგრაფიული მონაცემების და მათთან ასოცირებული ელექტრონული სერვისებისთვის უკვე ფორმირებული მეტამონაცემების თავსებადობის კონტროლს საერთაშორისო სტანდარტების შესაბამის მეტამონაცემების სტრუქტურასთან.
