მოცულობითი ინფორმაციის სისტემატიზებულად დაგროვება და შენახვა განაპირობებს მონაცემების ეფექტურად გაზიარების, გავრცელების და გამოყენების მექანიზმების ჩამოყალიბებას. მონაცემების შექმნის, დამუშავების, ნორმალიზების, შენახვის, განახლების პროცესების მართვისათვის აუცილებელია მოხდეს მონაცემების დოკუმენტირება ანუ მეტამონაცემების ფორმირება, რაც საშუალებას იძლევა სივრცით ინფორმაციასთან დაკავშირებული პროდუქტებისა და სერვისების ნომენკლატურა უფრო გაფართოვდეს, სივრცითი მონაცემები და ელექტრონული სერვისები აქტიურად გამოიყენებოდეს საქმიანობის სხვდასხვა დარგსა და სფეროში განსხვავებული საკითხების დასარეგულირებლად.
მეტამონაცემები ტექნიკური განმარტებით არის მონაცემები მონაცემების შესახებ ანუ მონაცემების აღმწერი ინფორმაცია.
მეტამონაცემების საშუალებით შესაძლებელი არის სივრცითი მონაცემებითა და მათთან ასოცირებული ელექტრონული სერვისებით ეფექტური სარგებლობის უზრუნველყოფა. აუცილებელია მომხმარებელი ფლობდეს ინფორმაციას ამა თუ იმ მონაცემის და ელექტრონული სერვისის შესახებ რომ გადაწყვიტოს რამდენად შეესაბამება მონაცემები, მისი გამოყენების მიზანს.
